越南暴徒無人性 無謂送羊入虎口
古人教落，君子不立危牆之下。越南反華示威演變成暴亂，並迅速蔓延全國，無數華資企業被破壞，中國人慘遭殺害，當地華人幾乎人人自危。但奇怪嘅係，喺咁嘅情況下，本港旅行團照舊出發前往當地，你話係咪搵命博吖？
即係咁，港府話就話先後發出黃色及紅色外遊警示，呼籲計劃前往或已在越南嘅港人留意局勢，提高警惕及注意安全。不過隨着形勢迅速惡化，反華示威已經失控，越南已淪為九反之地，淨係紅色警示又點夠吖！
呢次係越南廿年來最嚴重嘅反華暴亂，據報已造成至少二十幾人死亡，其中多數係華人，仲有唔少華人下落不明。暴亂從南部蔓延到北部，被暴徒洗劫破壞嘅華資工廠數以千計，除咗大陸同台灣廠家遭殃，連港商亦被波及。有消息指，今個周末越南仲會有全國範圍嘅大遊行，到時唔知又會有幾多華資工廠被搶掠，幾多同胞死於非命。
最恐怖嘅係，反華暴徒已經殺紅了眼，視人命如草芥，手段殘忍，唔理三七廿一，見到華人就襲擊，香港人去到當地咯喎，咪隨時成為箭靶？
冇錯，港府先後發出黃色及紅色外遊警示，提醒港人注意風險，盡量唔好去越南。問題係，參加旅行團嘅市民已經交咗費用，焗住冒險出發，分分鐘成為越南暴徒發洩嘅目標，萬一搞出人命，呢隻鑊邊個孭吖？
特殊情況必須特殊處理，好明顯，紅色警示已經唔能夠真實反映港人赴越南面對嘅巨大風險。目前越南嘅情況非常惡劣，反華暴亂遍地開花，喺呢個威權國家出現咁大規模騷亂，好明顯背後有政府嘅默許甚至策劃，本港旅行團繼續前往當地，豈不是自動送上門受靶？
係，泰國曼谷發生騷亂，港府亦對泰國發出黃色外遊警示。不過，兩個國家情況唔一樣，泰國嘅騷亂係紅衫軍同黃衫軍窩裏鬥，就算演變成暴亂，都唔會針對外國人。越南就完全唔同，成千上萬暴民衝入華人社區同工廠區，見到有中文招牌嘅企業就打砸搶燒，見到講華語嘅人就追殺，風險之大，可想而知。
總而言之，一個無賴政府加一班失去理智嘅暴民，乜事都可能發生。越南家陣咁嘅環境唔止有「明顯威脅」，可以話係「嚴重威脅」，人命關天，唔係講玩o架。計太一叮話齋，小心駛得萬年船，對越南應該盡快發黑色警示，須知墨守成規，後患無窮，港府千祈咪搵市民條命較飛吖。老實講吖，暫時唔去越南咁嘅落後國家旅遊好閒啫，係咪！
