SUN搞作：打橫嚟講：唔想有「佔中」　，我有計……

如今，成個香港廢柴政府一聽到「佔中」二字，就心撕膽裂，手騰腳震，只懂狂吠，話「佔中」係「違法」嘅！係「有危險」嘅……

傳聞，有次，吳得掂去學校宣傳「反佔中」，講「佔中」係違法行為，有學生問「佔中」違了哪條法例？呵哦！吳得掂即時斷片，呆在當場！又係喎！政府班庸官奴才日噏夜噏，話佔中違法，至今，無人說得清楚，人家違了甚麼法？

多過三個人一組的「非法結集」？俗稱「遊雞」的「遊蕩罪」？阻街？尋釁滋事？擾亂公安？特立獨行？

另有學生問「佔中」點解會好危險？係咪啲差人一定會用棍毆人，或箍人兼噴胡椒噴霧？又秒殺吳得掂！

老老實實，那個「佔中行動」，未必搞得成嘅！只要阿爺鬆一鬆章，假扮肯聽市民意見，而非靠「激進建制派」班奴才幫腔，或文首兩隻鷹犬胡叫，形勢一定不會如斯繃緊；甚至退一步，將政改門檻調低，加番早前考慮過的「公民推薦」，覆桌翻閹上榜，包保無人想去佔中，真係唔怕出動坦克車咩？

仲有呀！就算畀「泛民」有人入到閘（即係阿爺心儀的單仲偕），全港一人一票去選，以土共的鐵票動員能力之強，派個葉國謙之流（或一隻豬）都贏三條街啦！何須叫吳得掂出來扮惡嚇啲校董校長呢？

吖！欲政改方案得完善成功，請將那些有損香港市容的騎呢怪收入籠底啦！尤其那件「禍港雜音」嘅白頭佬，佢真好樣賤、乞人憎，有反效果呀！收番佢啲維穩費啦！　　　

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府