城中鏡：券商創新會肖鋼又甩底
中國證監會主席肖鋼突然宣布缺席嚟緊嘅內地證券商創新大會，臨急臨忙推咗副主席姚剛代為演講。堂堂主席連續兩年臨時「甩底」，真係潑咗一眾內地證券商一頭冷水。
肖鋼臨時缺席內地證券商創新大會，嚇親一班投資者。（資料圖片）
肖鋼由上年三月開始擔任中證監主席，平時低調謹慎，但大家都知其實佢對市場改革有自己一套大計。佢缺席大會嘅消息一傳出，都即刻嚇親一班投資者，券商股尋日亦即時震一震，跌咗百分之三。
正當大家都覺得肖鋼主席為人過於低調之際，卻發現原來中證監昨日剛發布了《關於進一步推進證券經營機構創新發展的意見》，從細則看，中證監鼓勵證券經營機構探索新型互聯網金融業務，支持自主創設私募產品，證監會並會放寬行業準入，支持民營資本同進一步放寬證券經營機構外資準入條件。哦，原來肖鋼主席要講嘅證券業創新都已經講得清清楚楚，出唔到之後嘅券商創新大會，都有晒交代囉！
