城中鏡：食唔安坐唔樂
雖然立法會嘅「拉布」戰踏入第六日，「拉布」三子拚死豁出去就冇得好講，但建制派議員則抱怨佢哋搞到食唔安坐唔樂，困坐會議廳真係兩敗俱傷，但議員Tony謝偉銓反而話受惠於「拉布」戰，咁神奇？
陳恒鑌在「拉布」期間食飯要透過手機睇實立法會個「大市」，準備隨時起跑返會議廳。
何俊賢獲贈地盤專用耳筒，阻隔響鐘聲。
謝偉銓話「拉布」反而令佢得閒咗，可以準時滴眼藥水。
要計埋返會議廳步速
原來Tony早前因視網膜過薄而要接受激光手術，手術後要每隔四小時滴一次眼藥水，佢笑言受惠於「拉布」，所以工作量冇咁大，得閒準時滴眼藥水喎！不過，唔係個個議員都好似佢咁樂觀，好似阿Ben陳恒鑌就相當抗拒煩厭嘅響鐘聲，為免出現幻聽，佢特登買咗個地盤專用耳筒阻隔鐘聲，透露耳筒連地盤打樁機噪音都阻隔到，如入無人之境，難怪買多個畀黨友「高佬賢」何俊賢「享受」。
建制派議員除咗大呻耳仔受罪外，又批評「拉布」議員特別鍾意趁用膳時間要求響鐘召回議員，搞到佢哋想坐定定食餐飯都唔得，可能要隨時折返立法會。阿Ben計算過自己最高步速，只要響鐘約十分鐘起步離座都趕得切返會議廳「打卡」報到。Alice麥美娟就自嘲跑得慢，響鐘八分鐘就要開始起跑，否則就趕唔切，分分鐘成為流會罪人，難怪人人都一肚氣。
阿Ben擔心一餐飯分咁多次食，長此下去會出現腸胃問題，決定唔食湯麵、白飯呢類唔擺得耐嘅食物，特別推介撈麵或壽司呢啲乾身嘅食物，咁就唔怕食壞腸胃啦！其實一餐飯分幾次食都唔算慘，事關政制及內地事務局副局長劉江華曾經同人講，自己做議員時，就因為「拉布」而搞到去廁所都要分幾次去，睇怕冇人夠佢慘啩？
