中西區區議會早前開會審議推廣《基本法》宣傳工作二十五萬元撥款時，白鴿黨嘅「乳鴿」區議員許智峰質疑會議黑箱作業，建制派涉嫌利益衝突，於是大鬧區會，甚至發展到後來嘅絕食靜坐。其後該黨高調召開記者會、喺立法會質詢有關區會工作嘅透明度同審批撥款方式，同埋相約外號「騰雞美華」嘅民政事務總署署長陳甘美華會面討論事件。就喺會面之前，有人就發現總署不動聲色開始陸續更新十八區區議會網站，據聞中西區嗰網站係最快更新嘅一個。

設計圖片及對白

據理解，總署唔單止將資料文件同傳閱文件上載到網站，就連喺工作小組及各大小委員會項目中，都列出各委員會職權範圍、成員名單同會議文件同錄音添！總署突然咁高效率，極速提高區議會透明度，莫非騰雞美華見勢色唔對，擔心事件升溫，於是急急補鑊？民政事務局就回應話，如果唔係涉及閉門會議嘅事項，區會秘書處一般都會將相關文件上載至網站，秘書處亦會安排加強服務，喺人手許可下，將傳閱文件同補充資料都上載至網站喎！

除咗後知後覺外，亦反映騰雞美華嘅政治危機意識不足。何解呢？其實二十五萬元撥款對區會嚟講，話多唔多，話少唔少，就因為呢筆撥款用作推廣《基本法》就變得相當敏感，尤其喺依家複雜政局環境之中，隨時成為泛民主派嘅攻擊「彈藥」，騰雞美華作為高官冇可能預視唔到，一味放晒手畀建制派去搞，結果咪搞出個大頭佛囉！

第一手消息請下載on.cc東網iPhone/iPad/Android/Windows Phone Apps