政壇：建制圍魏救趙護林健鋒
立法會政府帳目委員會聽日就盛事基金成效不彰進行第二次公開聆訊，委員會主席「大舊石」石禮謙尋日喺閉門會議上話想傳召商務及經濟發展局局長Greg蘇錦樑出席聆訊。不過，阿Greg明明都冇出席第一次聆訊，所以建制派咁做擺明係想「圍魏救趙」，希望借擺阿Greg上枱，放生盛事基金主席林健鋒，等佢唔使做箭靶被人圍插。
設計圖片及對白
帳委會喺幾日前就盛事基金進行第一次公開聆訊，當時有委員批評盛事基金係一筆「糊塗帳」，又批評政府官員帶委員「遊花園」。出席聆訊嘅商務及經濟發展局常任秘書長（工商及旅遊）黃灝玄承認，當年廉政公署曾經建議將基金歸還政府，但當局判斷報告並唔重要，所以冇對外披露。呢件事更加揭露時任嘅「貪曾」前特首曾蔭權爵士當廉署報告係耳邊風。
料集中問陳鑑林
雖然第一次聆訊已經鬧爆「龍獅節」行政失當，但據聞由於上次有份作供嘅導演高志森唔喺香港，預料委員到時會集中向龍獅節籌委會召集人陳鑑林發問。不過，唔知點解帳委會尋日召開閉門會議時，大舊石突然心血來潮話要傳召阿Greg上帳委會，搞到其他委員百思不得其解，唔明點解有黃灝玄為局方政策解畫，無端端又要叫埋阿Greg。
不過，大舊石根本就唔係有問題想問阿Greg，而係想將焦點轉去局長身上，等佢黨友林健鋒可以乘機甩身。咁又係，當阿Greg一出席帳委會，委員就會鬧爆當局監管不力，又點會有時間鬧林健鋒辦事不力呢？據聞阿Greg明日應該仲喺青島出席亞太經合組織貿易部長會議，但唔緊要，因為帳委會話點都會等佢返港出席會議喎，睇嚟佢都係走唔甩o架喇！
