反腐劍指梳打埠 澳門濠賭無運行

嗱，港股連跌幾日啱啱企定，澳門賭股就繼續插水，跌到阿媽都唔認得，一日總共蒸發八百幾億港元市值，簡直係一場小股災。濠賭股爆煲，澳門呢個內地貪官嘅洗錢天堂睇怕都劫數難逃咯。無他嘅，內地全力反腐，貪官唔敢上門，澳門賭場少咗呢班豪客，邊度仲有運行吖；加上五一長假期訪澳旅客減少、個人遊訪澳簽證將會收緊，仲有銀聯卡加強措施防洗黑錢，同埋傳聞有大客捲款潛逃，各種負面消息齊齊爆發，濠賭股唔跌到四腳朝天至奇吖。

話時話，澳門近年賭業一枝獨秀，表面繁榮，財源廣進，其實金玉其外，敗絮其中。有人計過數，回歸以來內地貪官透過澳門賭場及購買鑽石、珠寶、物業等方式清洗嘅黑錢估計超過十萬億港元，淨係透過銀聯卡非法流入賭場嘅資金一年就估計高達五百億港元，唔怪得澳門被稱為「超級洗衣店」喇。

最令人質疑嘅係，澳門回歸後開放賭權，法例寫明只發三個賭牌，結果竟然變成六個半，除咗何鴻燊家族同其中三個半賭牌有關，美資財團更加係大贏家。淨係三家美資賭牌公司咋，過去五年就從澳門搬走八百億港元，有人話澳門博彩業根本就係為美資而設，真係冇誇張o架。係呢，澳門藏污納垢，烏煙瘴氣，唔通北大人冇責任咩？

其實，澳門之所以搞成咁，同內地高官絕對有關，佢哋其身不正，包庇貪腐，甚至上下其手，同流合污，卒之發生歐文龍世紀巨貪案，該案除咗涉及劉鑾雄及羅傑承等多名港澳政商名流，而且涉及眾多內地貪官，好多醜聞只係暫時被遮住，未被踢爆嘅咋。

正所謂，春江水寒鴨先知。隨着內地反腐風暴殺到嚟，澳門風聲鶴唳，嗰啲大鱷見到勢色唔對，聞風而遁，咪搞到濠賭股一瀉再瀉囉。嗱，千祈唔好諗住撈底博反彈吖，反腐風暴方興未艾，澳門可能仲有排衰，賭股博唔過o架。

太一叮始終都係呢句，有咁耐風流，就有咁耐折墮。澳門成也賭博，敗也賭博，烏煙瘴氣不特止，仲變成內地貪官嘅銷金窩，搞到北大人忍無可忍而要出手整頓，再咁落去，呢隻會生金蛋嘅肥鵝，遲早變成風乾臘鴨嘅咋，叮！