呢排天氣潮濕多雨，特別容易令人周身唔舒服。尋日下午大約四點鐘就撞見利豐集團榮譽主席Victor馮國經現身名醫雲集嘅中環中建大廈，跟住佢上到一間腦內科專科診所，期間逗留大約四十五分鐘後離開。Victor有乜嘢事要睇腦內科咁緊要呢？原來佢只係睇腳患，仲笑笑口話冇乜嘢，大家唔使擔心喇！

登記掛號

度高磅重

大玩手機

步履輕快
馮國經離去時對腳唔似有乜大問題。

Victor一入到診所就去登記，然後按護士指示除低西裝度高磅重，跟住坐埋一邊等候，一邊篤部智能手機消磨時間。等咗大約十分鐘，就輪到佢入病房睇醫生，仲睇足二十五分鐘後至出番嚟。睇嚟呢位城中知名嘅腦神經科專科醫生都睇得好詳細，亦好盡責咁同佢解釋病情。

健步如飛 唔似有事

喺Victor離開診所時，記者上前問候佢身體有乜嘢唔舒服，點解要睇腦內科？佢一派輕鬆話嚟睇左腳咋，因為年紀大，退化，強調冇乜嘢大礙，就算做運動都冇問題，只要慢慢嚟就得喇！咁究竟係乜嘢病呢？佢好客氣咁話：「私人嘢，唔好講喇！」然後講拜拜離去。見佢離開時，行路活動自如，步履輕快，望落又唔似有乜大問題喎！

點解腳患要睇腦內科？請教過高人，其實腦神經對人體嘅影響十分廣泛，咪話腳患，連吞嘢落肚有困難都同腦神經有關。話時話，Victor今年已六十九歲，真係要好好保養身體。

第一手消息請下載on.cc東網iPhone/iPad/Android/Windows Phone Apps