美國對沖基金綠光資本（Greenlight Capital）創辦人艾因霍恩（David Einhorn）透露，原來最近同聯儲局前主席伯南克食晚飯，佢話一直有好多話憋喺心，當晚把握機會和伯老交流（正確嚟講係對質）。佢企圖用「啫喱冬甩」理論同伯老拗，但都係拗唔贏。

艾因霍恩最近同聯儲局前主席伯南克食晚飯，當然把握機會同佢交流。（資料圖片）

所謂「啫喱冬甩」理論，係指即使好好食嘅嘢，食得多都會滯，佢話：「低息和量寬開始時無疑有用，但邊際回報會遞減，即是當你食到第三十五個冬甩，你感覺會很差，甚至想嘔。正如低息環境維持一段十分十分長時間，對存戶造成嘅傷害會超過對經濟嘅好處。」

伯老就直指艾因錯，因為始終有人要為加息付鈔，此對經濟沒有創造價值，而且存戶同時為借款人，佢哋最終要付上代價。艾因就反駁伯老經常講財政刺激不足，其實只要加息，一直受惠低息嘅美國政府，就變相還富於民，此為解決華府經常投訴國會阻手阻腳嘅方法。另外，存戶會將部分增加嘅利息收入攞去消費，也有助經濟。

除咗拗低息環境之外，艾因又提到伯老話百分百肯定美國無惡性通脹嘅講法，覺得非常驚訝，佢質疑點解有人可以咁肯定？

第一手消息請下載on.cc東網iPhone/iPad/Android/Windows Phone Apps