熱石按摩無王管 美容隨時變毀容

唔係嚇大家。就講愈來愈多都市女性鍾意做嘅熱石按摩減壓吖，唔少人事後投訴，話減壓就減唔到嘞，「辣到飛起」就有份，簡直貼錢買難受。一位八十後OL向本報回憶慘痛經歷，佢早前到紅磡一間美容院做熱石及通淋巴療程，正當喺按摩床上除晒衫最放鬆之際，背部傳來一陣劇痛，原來塊熱石太熱，美容師好似燙手山芋咁揼都揼唔切，錯手拋到佢背上。

苦主向記者展示粉背傷勢，一條長約六厘米嘅傷口清晰可見，我見猶憐。醫生證實佢屬於二級燒傷，好大機會留有疤痕。有皮膚科醫生反映，近年接收多宗女士做熱石按摩被燙傷嘅個案，可見問題嘅嚴重性。

減壓變增疤，美容變傷身，咪因為當局無監無管囉──請注意，唔係「監管不力」，而係完全無監無管。苦主曾向衞生署投訴，點知對方竟然關人個關，話美容按摩唔歸佢哋管，署方亦無註冊美容師制度喎。原來成個美容業根本係無掩雞籠，唔怪得有業界人士踢爆，有美容院偷雞唔用專用熱石機，而以電飯煲煲水將石頭加熱，咁啲石咪好容易熱過龍辣親人囉﹗

話時話，熱石美容唔係今時今日至流行，當局早應該加強規管啦，今次就話好彩只係灼傷背部啫，下次有人毀容邊個孭鑊呀？你知啦，港產官僚一個二個平日懶燒香，臨急抱佛腳，唔搞出人命都唔做嘢嘛。呢，兩年前一間醫學美容集團搞出毒血針奪命事件，當局事後風風火火，又話要加強巡查，又話要修例堵塞，煞有介事咁，點知法例修訂到依家都未見影，就連邊啲美容療程應該列入醫學美容範疇都未有定案。當局零監管，市民光顧美容機構根本無從分辨優劣，同搵命博冇乜分別。

他山之石，可以攻玉。好似新加坡咁，多年前已經制訂美容療程黑名單，提醒消費者邊啲美容療程缺乏科學論證；又例如要求美容師考取急救證書，萬一發生意外都可以減輕傷害。總而言之，加強對醫學美容監管，保障消費者安全，辦法多的是，睇吓當局有冇心做嘢嘅啫。

唉，港產官僚鬧極唔醒，渾渾噩噩，有朝一日佢哋家人嚟幫襯「超級熱石按摩」搞出禍，咁就知驚喇，叮！