潮語「紅都面晒」，其實即係指「面都紅晒」。點解要將「面」和「紅」兩字掉轉呢？查實係冇得解，純粹係貪得意之作。啲人將啲字調吓位，但係對方又明白喎，久而久之就流傳起上嚟成為潮語。

香港人唔止係政治冷感，到咗今時今日，直情有政治潔癖。逢親有關少少牽涉政治嘅嘢，即刻耍手擰頭，劃清界線。但係，其實政治嘅嘢，你唔搞佢，唔代表佢唔會搞你。好似海怡西區有個商場，打算租畀名店做Outlet，勢必引嚟一大批個人遊旅客，直搗海怡。令本來寧靜嘅住宅區，成了另一個中國式消費熱點，影響居民生活。早前海怡西區區議員補選，區內嘅「中產」選民，親手將一個建制派送入議會，之後就出現呢單嘢，兩者唔知有冇關連呢？如果冇關連，就希望海怡嘅建制派議員，可以為居民討回公道，單挑地產商。你估佢哋會做嗎？另一方面政治影響民生嘅，當然係港鐵。因為政府係港鐵大股東，政府嘅劣質官治文化，當然會影響港鐵管理。最近港鐵接二連三出事，高鐵工程又嚴重超支，運輸及房屋局局長張炳良被踢爆一早知情，但佢竟然用語言偽術去解釋，同其他特區政府官員一樣，不「負」所託，畀着我咁講嘢法？真係「紅都面晒」！

其實除咗「紅都面晒」之外，仲有個類似嘅潮語叫做「時夠唔間」，意思即係「唔夠時間」，呢句喺廣告界圈子已經流傳了一段時間，最近喺一啲討論區都有人常用。根據呢個邏輯，好多四字詞都可以咁樣重組句子，調位玩吓。例如「無可奉告」可以係「告無可奉」；「馬不停蹄」可以變「蹄不停馬」；「等位食飯」可以係「位等飯食」，講吓講吓，就會潮起上嚟。

另一樣政治影響生活嘅，當然係個人遊政策。網上有大陸人曾經揚言，要嚟香港隨街便溺，挑戰港人。難為呢啲強國人，可以「不顧國體」，以糞便彰顯中華民族嘅優良傳統，真係唔會「紅都面晒」。

第一手消息請下載on.cc東網iPhone/iPad/Android/Windows Phone Apps