「垃圾！垃圾！全部都係垃圾！」淫賤黎喺會議室為咗跌紙大發雷霆，唔單止編採部門，連廣告部會計部小食部嘅阿頭都中晒流彈，當然，本虫修煉咗咁多年，已經係寵辱不驚o架喇，只不過喺淫賤黎面前，梗係要流露一臉惶恐，等佢插得High啲啦。

趁住淫賤黎鬧到氣喘，身為腦腫嘅我即時獻計：「正所謂公欲善其事，必先利其器，腦細，壹全霉啲電腦已經係石器時代產物，不如我哋嚟個大更新，提升科技水平，相信對銷量……」啪一聲，一份《爛果》掟向本虫俊臉，到底，到底我又講錯乜？

淫賤黎以睇唔起我嘅眼神睥埋嚟，問咗我一個好玄嘅問題：「港鐵控制中心夠腦殘啦，後果係乜？」嘩，後果梗係嚴重啦，「腦細，日日搞到交通大亂，影響廣大市民，都算係重大事故啩？」啪啪啪！淫賤黎今次直頭兜巴星埋嚟：「影響市民又點？日日壞車又點？啲人咪又係日日逼住搭港鐵，有得揀咩？如果你好似港鐵高層咁叻，我哋啲腦有幾殘，跑新聞有幾渣，都唔會影響銷量啦！」會議結束前，淫賤黎為壹全霉定下改革方針─向港鐵學習，本虫亦痛定思痛，將港鐵電話簿咁厚嘅故障紀錄攞出嚟，好好研習一番。

第一手消息請下載on.cc東網iPhone/iPad/Android/Windows Phone Apps