政壇：劉羅戴罪之身照樣高調快樂
捲入澳門巨貪奇案嘅華人置業前主席劉鑾雄（大劉）及南華足球隊足主兼商人羅傑承，自從被控行賄及清洗黑錢控罪成立，分別遭澳門初級法院判囚五年三個月後，雖然兩人一直「潛水」唔敢過澳門，但就喺香港頻頻現身，原來「戴罪之身」都可以咁高調同快活。
劉鑾雄去灣仔富豪飯堂食晏時面燶燶，十問九唔應。
羅傑承悶悶不樂單手托腮，趴喺欄杆上觀看馬匹試閘。
先講羅傑承，佢尋日朝早七點幾鐘就同太太去到跑馬地馬場睇馬匹晨操。身穿外套同牛仔褲嘅羅傑承，喺抵達馬場後，就同太太前後腳行，兩人匆匆忙忙咁去咗搵騎師傾偈。期間羅傑承神情認真，但又不時顯得神態輕鬆，到佢平靜落嚟後，就好似悶悶不樂咁單手托腮，趴喺欄杆上觀看馬匹試閘，莫非「戴罪之身」特別情緒化？抑或係太多煩惱呢？
至於大劉就依舊喺食晏時間到灣仔一間富豪飯堂食飯，下午約一時，大劉胞弟劉鑾鴻（細劉）獨自抵達飯堂，十幾分鐘後大劉女友拖男帶女抵達，幾分鐘後先至輪到大劉現身。見佢身穿深色褸，一落車就保持一貫面燶燶表情，兼十問九唔應，急急腳行入飯堂。佢哋食咗約一個鐘頭後，齊齊步出飯堂，再各自乘座駕離開。
