政壇：谷創科局蘇錦樑吹錯雞
當局重提成立創新及科技局（創科局），主力推動設局工作嘅商務及經濟發展局局長蘇錦樑最近都谷到行，仲透過政治助理陳百里「吹雞」，號召唔少建制派團體尋日出席立法會公聽會撐場，八十幾個發言團體中，真係燕瘦環肥包羅萬有，搞笑嘅係，當事人似乎都搞唔清創科局嘅角色，將低科技、高科技混為一談，有飲食界商會發言時仲大講雞蛋仔科技，唔係嘛，創科局靠呢啲撐？
大講雞蛋仔機先進
資訊科技及廣播事務委員會尋日召開特別會議，發言團體中包括叙福樓集團執行董事黃傑龍（Simon），Simon以稻苗學會主席身份現身發言，甫開口就話冇入錯門口，指學會雖然係餐飲業商會，但強調科技從來唔係一門獨立產業，唔少地區嘅飲食界已經識得利用科技增加效率、節省成本，香港就「跑輸大市」。佢跟住話時下好多飲食業員工返工唔再用傳統嘅打卡報到喇。
佢跟住引用台灣例子，指有當地人發明喺雞蛋仔機設機關，按個掣就可以代替人手反轉部機，焗雞蛋仔嘅另一面，慳水慳力仲免卻工作勞損，可惜香港遲遲未引入，反映香港科技應用完全滯後，所以佢支持成立創科局喎。佢所講嘅科技，同政府標榜創新科技局要拓展嘅範疇冇乜關係噃，充其量係應用科技咋！好心蘇錦樑搵人撐，都做多啲工夫啦。
一早揚言會「拉布」反對建議嘅梁國雄（長毛）尋日繼續企硬，批評政府興建嘅數碼港同科學園全部淪為地產項目，對政府冇晒信心喇。睇嚟，創科局嘅前景仲有得拗。
