主題場館無影蹤 奧運文物歸何處
大家記唔記得○八年香港協辦北京奧運同殘奧馬術比賽嘅宣傳口號？冇錯嘞，就係We are ready。呢句口號係就係幾豪氣嘅，可惜港府籌備期間甩漏多多，比賽場地甚至出現假天花倒塌，證明港府當時根本未準備好，宣傳口號淪為笑話。
太一叮舊事重提，唔係想 翻舊帳，而係因為呢個笑話仲有下集。話說○八年港府同賽馬會宣布興建奧運主題公園同香港奧林匹克博物館，紀念香港協辦奧運，點知眨下眼六年過去，公園同博物館仍然無影無蹤，莫講話未準備好迎客，甚至冇再提起，可能呢個計劃已經不存在咯啩。
呢，本報記者實地視察大角咀奧運主題公園選址，發現仍然係爛地一塊，四邊被鐵欄圍起，原本計劃擺放嘅火炬雕塑同京奧吉祥物福娃海報就冇嘞，花盆、垃圾桶等雜物反而隨處可見。鬼咩，原來該處一直閒置，依家已變成康文署嘅雜物倉庫兼種植場。而位於沙田彭福公園嘅奧林匹克博物館亦唔好得幾多，同樣係十畫未有一撇。
主題公園同博物館冇着落都算嘞，最離譜係當年奧運「遺物」竟然無處容身，被迫散落各地。好似聖火火盆同奧運五環標誌咁吖，求其放喺沙田彭福公園，乜嘢文字介紹都冇，遊客根本唔知係乜；「滯留」沙田大會堂空地嘅京奧吉祥物雕塑仲慘，長期冇人打理，搞到污糟邋遢，唔知仲以為係垃圾添﹗
咁就奇嘞，興建奧運紀念場館啫，又唔係填海造地，照計冇乜爭議，點解拖足六年都未搞掂？退一步講吖，即使紀念場館一時三刻未能起好，康文署轄下咁多博物館同展覽場地，暫時存放奧運文物完全冇問題啫，點解要搞到無處容身呢？正如有立法會議員話齋，奧運紀念場館既可發展成旅遊景點，又可鼓勵市民運動，港府連門面工夫都唔做，根本無心發展體育。
老實講，港府發展體育吹水唔抹嘴，並非今時今日嘅事，奧運紀念場館落成無期只係其中一個例子咋。嗱，每次香港運動員喺國際賽事獲得佳績，港產官僚都不失時機撲出嚟抽水，男足東亞運奪金咩，就話要振興足運；牛下女車神李慧詩倫敦奧運摘銅而回，就話要發展單車運動。問題係，抽完水、做完騷又點呢？大球場依然爛溶溶，連奧運文物都當垃圾丟埋一邊，你話港府對發展體育究竟有幾多誠意吖？
講多無謂，食多會滯，與其坐而論道，口號多多，不如實實際際，由小處做起。港府要發展體育，唔使多講，搞好奧運紀念場館先啦，叮！
