SUN搞作：打橫嚟講：問你：香港仲有無希望？
各位讀者老友，問你一句：你覺得香港呢度仲有無希望吖？
「無！」這是我「依家」的答覆！（哈！好「偽語」。）
我不是悲觀，而係「現實的表述」，因睇到的實情係咁嘛！
嗱！看看港鐵！因高鐵工程延誤，所講的搪詞，唔係賴天雨，就係賴地硬，明明係一個大話冚一個大話。家吓，啲高層紛紛跳船便知個鑊氣有多大。話唔埋，又要勞煩ICAC了！
咁都未算出事！港鐵居然為「擺平」民憤，便成立個獨立委員會，要早過立法會提出引用特權法去調查，但此委員會卻委任港鐵的非執行董事「自己人查自己人」，是否想開玩笑呢？吖！仲未夠荒謬呀！因那委員會的主席，竟是前朝高官，若大家沒有失憶的話，應記得佢離職理由，係個腦有事呀！用一個「腦」有「殘」疾的人做董事，已出奇的了！家陣，仲做埋「調查委員會」的主席，玩乜呀？大佬！
大人有「腦殘」的問題，細佬又點呢？
受政黨力捧的年輕俊彥，在立法會公聽會發表「反對全民退保」，被一位街坊婆婆X交叉y佢，此小子面不紅、氣不喘地在座位處篤手機玩遊戲，仲特意舉高部機畀人睇，佢事後向記者說係知道有人影緊相，佢專登唔收手嘅！呢種無聊的小學雞行為，就係未來接班人？你哋話，香港仲點有得救呢？
小朋友的品格「素質」，同大陸的官二代水平相若，似未戒奶的牛奶仔，如何守衞香港的核心價值？透過香港積累的世界觀能量，幫助祖國跟世界接軌呢？返屋企戒奶先吧！
香港唔死，實在是有天主天帝庇祐也！
彭志銘
次文化考古學家，對城中潮語有深入研究，博徵博引，廢官廢人行埋一邊。
歡迎add我facebook一齊(目及)實政府
