城中鏡：政壇師奶廚神 遊非不忘偷師
港區全國人大代表馬豪輝太太Elaine廖千睿，早前趁住復活節長假期，同五個朋友去咗南非旅行，期間去咗位於博茨瓦納（Botswana）嘅喬貝國家公園，近距離接觸野生動物，而出名愛烹飪嘅佢仲拜訪當地大廚學煮地道菜，過咗個畢生難忘嘅假期。
廖千睿（右二）喺導遊Rix（左一）同其他當地人帶領下，認識南非大自然。（受訪者提供）
第一次去南非近距離接觸斑馬等野生動物，令廖千睿畢生難忘。
廖千睿（左）教當地廚師（右）煮「炒底白汁雞皇飯」。
「牛肉粟米乾」係非洲當地非常豐富嘅地道早餐。
今次Elaine去非洲經歷十四日奇幻旅程，以觀賞各類野生動物時最為刺激。講到最驚險嘅場景，就係有日黃昏後拍攝貓頭鷹時，佢突然被導遊拍拍膊頭，細聲叫佢唔好郁，原來遠處有兩隻母獅行緊過來，仲愈行愈近，走到佢身旁。佢當時同兩隻母獅只有一道矮矮嘅車門之隔，心諗今次惟有聽天由命，幸好最後有驚無險，獅子望兩眼就轉頭離開。
遇大象發火 極速脫險境
其後佢哋又遇到發嬲嘅非洲象，眼前車頭燈照住嘅非洲象，一見到佢哋就大力拍動耳朵，然後高聲鳴叫，同行導遊知道呢個係大象發火前嘅警告，司機於是立即退後車輛並全速離開，帶眾人脫離險境。不過，佢哋亦有幸見到溫馴嘅瞪羚、長頸鹿同一群又一群顏色非常絢麗嘅蝴蝶及雀鳥喺沼澤地區棲息。
有「政壇師奶廚神」稱號嘅Elaine，梗係唔會放過學習烹調非洲土著菜式嘅機會啦。當地大廚Samuel Simasiku教佢煮咗個「牛肉粟米乾」，已經係非常豐富嘅地道早餐。之後佢又教番當地人煮咗個「炒底白汁雞皇飯」，仲教佢哋點樣擺伴碟，互相切磋廚藝。
