政壇：高鐵狙擊手曾維護九鐵
廣深港高鐵香港段超支兼延期風波鬧得滿城風雨，熟悉鐵路運作嘅立法會議員「田二少」田北辰近日化身「高鐵狙擊手」，多次質疑高鐵涉嫌虛報施工進度，踢爆港鐵一層層嘅掩飾。咁啱十一年前，田二少出任九鐵主席時，被揭發九鐵路軌出現裂痕，當時佢竟然話鐵路有裂痕係必然現象，一年有一、兩次好正常，只係唔喺繁忙時間發現，市民先無察覺。呢番說話一出，隨即被各界炮轟，唔知田二少仲記唔記得呢？
近日田北辰狂轟港鐵隱瞞高鐵施工程度。（資料圖片）
當年田北辰話路軌裂痕係必然，隨即被各界炮轟，最後要認錯收場。（資料圖片）
話說事隔三日後，田二少要出嚟澄清兼認錯，話自己冇歪曲事實，但講得唔清楚確係抵鬧，最終風波先能夠平息。呢場風波，日前就喺某電視畫面上重溫，唔知依家田二少睇番條片，會有乜感受呢？
