香港教育專業人員協會尋日聯同康文署，喺荃灣搞咗個好書龍虎榜頒獎禮，講明係教協搞嘅活動，會長馮偉華梗係頒獎嘉賓之一啦！不過，馮偉華向我哋透露，原來佢未睇過獲獎嘅任何一本書，因為佢最近大部分時間都要睇啲實用書用以教學，空餘時間就睇武俠小說，佢依家睇緊嗰本，更係第四次翻睇添，都咪話唔瘋狂。唔單止咁，佢仲話連囝囝都一齊睇喎，莫非囝囝被佢洗咗腦？

馮偉華笑說，佢只係放咗幾套武俠小說喺屋企，都冇規定囝囝睇，但就見到囝囝耐唔耐就接住睇新一集，所以估計囝囝都同佢一樣係武俠小說迷。至於佢所講嘅實用書本就係港府當年搞教育改革時嘅文件，佢話因為最近教授緊一科叫社會教育科，所以咪再細讀一次囉。唔知佢讀完呢一次之後，會唔會對教改有嶄新嘅睇法呢？

第一手消息請下載on.cc東網iPhone/iPad/Android/Windows Phone Apps