政壇：葉國謙屎橋防流會
立法會喺前日開始處理拉布議員就《二○一四年撥款條例草案》提出嘅近一千二百項修訂，但班議員開會僅僅四個鐘，就因為開會法定人數不足而搞到流會，認真羞家。負責協調建制派議員出席會議嘅議員葉國謙尋日就話，建制派已同意日後開會時議員要喺點人數嘅鐘聲響起五分鐘之內返回會議廳，以防再因唔夠人數而流會。佢呢個方法根本治標唔治本，議員開會本來就天經地義，照道理應該個個聽聽話話坐定定開會至啱。
設計圖片及對白
阿謙尋日接受電台節目訪問，對於前日立法會喺審議政府財政預算案時流會，佢呢頭就話議員出席會議嘅責任係不容推卸，但嗰頭又話依家議員感覺好似畀人挾持同摧殘，要被迫聽一啲無聊嘅議程。佢講到咁慘，好難唔令人認為佢無非都係想將責任推畀拉布嘅議員。
佢又話建制派喺流會之後商量過，要檢討吓議員喺響鐘後十四分鐘、即限時前一分鐘先返到會議廳係咪太遲，最後大家都同意要喺點人數嘅鐘聲響起五分鐘之內返到會議廳，以免發生議員因趕唔切返回會議廳而流會。
去洗手間褲都着唔切
其實舊年拉布時，都係頻頻響鐘，當時同阿謙分屬黨友嘅議員黃定光，就喺會議廳外發晒火，仲話：「點完（人數）又要點，我去廁所都得啩！」依家阿謙仲話要五分鐘內返到，莫講話議員喺辦公室等升降機搭升降機都唔夠時間，去緊洗手間嘅議員可能連褲都未着得切就要衝出嚟，佢呢條認真係屎橋。
老實講，班議員如果真係咁唔想流會嘅話，不如就乖乖哋坐定定開會，唔好兩頭騰喇，除非大家係口是心非，講一套、做一套啦！
