元創方春光乍洩 保古蹟不保私隱

太一叮講緊係啱啱開放畀公眾參觀嘅「PMQ元創方」，由荷李活道已婚警察宿舍活化而成，前身係孫中山先生母校中央書院，上世紀拆卸重建為警察宿舍，近年被評為三級歷史建築。當局當初講到天花亂墜，話活化後可以成為香港嘅標誌性創意中心，吸引創作企業家進駐開設工作室同店舖，並不時舉行展覽活動，既可保留古蹟，又可推動創意產業，集保育與商業於一身，係兩全其美嘅好事嚟喎。

實情係點？本報記者慕名到訪，真係不睇猶自可，一睇嚇到花容失色，平台地板係玻璃嘅，主樓樓梯係中空嘅，連圍欄都係透明嘅，話就話係採光設計，實際上係走光陷阱，尤其係平台玻璃地板為兩座大樓之間嘅主要通道，女士一旦途經，裙下春光一覽無遺。雖然場內職員化身護花使者，周圍提醒穿裙女士小心裙底，可惜吖，成個展示廊只得兩名職員，訪客一多，根本鞭長莫及，如果有人心存不軌眼甘甘，想阻止都阻唔切。

再睇兩座大樓樓梯，由於採用中空設計，梯級與梯級間有約五吋空隙，下層遊人一舉頭，上層女士春光現，隨時吸引瞥伯駐足「觀賞」。另外樓梯兩邊用上玻璃圍欄，着裙女士走近，同樣蝕底。咁嘅設計，簡直就係引人犯罪，「標誌性創意中心」想唔淪為瞥伯樂園都難。

元創方發言人解釋喎，已着手改善中空樓梯嘅走光問題，並喺玻璃地板旁邊張貼告示，提醒訪客「留意下層拍照」喎。問題係，啲告示字眼蚊螆咁細，途經女士未必睇到，加上走光黑點滿布，根本防不勝防。港產官僚眼高手低，顧此失彼，保存到歷史遺蹟，保障唔到女士私隱，實在令人啼笑皆非。

其實展示古蹟辦法多多，做乜一定要用玻璃設計呢？正如有資深建築師指出，香港八十年代引入玻璃地板設計，雖然可以提升採光效果，但好容易變成走光黑點，所以業內人士會加倍小心，尤其唔會喺有人長時間停留嘅地方用玻璃地板。人來人往嘅元創方大量採用玻璃，好明顯係設計失誤。

話時話，元創方嘅設計缺陷並非無法補救，例如將玻璃底部磨成半透明，問題只在官僚係咪有錯就改啫。太一叮有個建議，主事嘅發展局局長陳茂波不妨扮女人着裙入去走番轉，相信問題好有機會解決o架，叮！