城中鏡：榮智權爆上商有價有市
前排永亨公布以市帳率1.77倍賣盤，雖然低過市場預期，但買家華僑銀行基地新加坡就有唔少聲音認為買貴咗。港銀老字號上海商業銀行董事長榮智權就話，華僑銀行肯畀呢個價，證明香港金融業依然有吸引力，上商都不乏中外買家洽購，個價仲好過永亨，又指「三倍嘅話當然吸引」，但賣盤存技術問題，所以上商都未有考慮賣盤。
上海商業銀行董事長榮智權（右）同爸爸榮鴻慶（中）及囝囝榮康信（左）都獻身銀行界。（資料圖片）
永亨董事長兼行政總裁馮鈺斌尋日出席股東會，講起賣個親生仔畀華僑銀行，佢話自己年紀大，而大股東馮氏家族同紐約梅隆銀行都同意出售，就好似送個仔出國讀書，幾唔捨得都要咁做，「都係為佢好！」今次亦可能係佢最後一次出席股東會。佢話同嗰邊行政總裁錢乃驥幾老友，洽售過程都順暢，小股東亦唔覺得賣盤好可惜，大家表現好高興。
港銀買少見少，同大行競爭挑戰更大。榮董三代掌管住上商重要職位，現年九十一歲嘅爸爸榮鴻慶係銀行董事兼喺上海商業儲蓄銀行出任董事長，囝囝榮康信就擔任上海商業儲蓄銀行董事兼副總經理。榮董話下年就係上商建行一百周年，期間經歷過唔少困難，雖然唔少中小港銀已獲併購，但都盼望上商未來有機會做大。
