最低工資實施後，好多食肆都嗌晒救命，話好難請到洗碗工人，有啲仲話出到一萬五千蚊都冇人肯做。唔通因為咁，就連叙福樓集團執行董事Simon黃傑龍都要出動落舖頭洗碗？

黃傑龍洗咗短短四個鐘，雙臂已經好酸軟頂唔順。（互聯網圖片）

點解有咁嘅疑問？事關我哋喺社交網站見到一幅Simon洗緊碗嘅相，原來佢上禮拜落舖頭幫手洗碗，但唔係因為唔夠人手，而係想親身了解公司運作之餘，又可以同員工交流意見喎。

瞓過劏房嘅「窮富翁」Simon坦言，雖然所謂洗碗只係將碗碟放入洗碗機，但「洗」咗短短四個鐘，雙臂已經好酸軟頂唔順，冇幫倒忙已經算好嘞！

經過今次「微服出巡」，Simon似乎上咗癮，笑言下次想試吓落舖頭做「知客」，親自招呼班茶客喎！

第一手消息請下載on.cc東網iPhone/iPad/Android/Windows Phone Apps