城中鏡：試食愛心齋李文斌舔脷
嚟緊下禮拜二就係佛誕，篤信佛教嘅仁濟醫院總理Macy黃美斯忙到氹氹轉，事關佢有份幫手籌辦「荃灣佛誕嘉年華」，希望散播正能量之餘，亦為仁濟籌款。尋日佢特登約埋仁濟前主席Edmond李文斌同總理Paul葉恭正，去荃灣一間有份炮製齋菜義賣嘅茶餐廳試食，無肉不歡嘅Edmond同阿Paul食到舔舔脷，猛讚原來素食都可以咁好味。
李文斌（左）同葉恭正（右）平時好少食齋，試完齊讚好食。
劉伯輝（前左）、劉榮民（前右）、李葉安（後左）同區域總廚莊哥（後右），合力炮製齋菜義賣。
一直喺內地工作嘅Edmond，呢幾日趁五一黃金周假期返港，最近佢出任荃灣藝術節主席，依家忙於籌辦九月中登場嘅一系列藝術活動，仲忙過返工。
阿Paul亦不遑多讓，近排為旗下賽車公司忙到周圍飛，日前啱啱返港，今日又再飛日本。不過，阿Paul係籌辦佛誕嘉年華活動嘅副主席，頻撲啲都冇計啦！
多間企業出錢出力
今次活動係由香港佛教聯合會主辦，荃灣西方寺承辦，仁濟係受惠機構，活動一連兩日喺荃灣沙咀道遊樂場舉行，除咗有綜合表演暨傳燈法會，佛誕正日仲有浴佛典禮暨嘉年華會，到時將有慈善義賣、素食同攤位遊戲等。
Macy話今次區內好多企業同社團都出錢出力支持，包括某飲食集團幫手煮齋菜，仲有中醫骨傷科名醫進行義診，希望齊齊行善積福。
負責齋菜嘅飲食集團代表劉伯輝、劉榮民同行政總廚李葉安等人尋日齊出動，展示為義賣而設計嘅創意齋菜小食，包括香煎猴頭菇同冬蔭功湯米粉等，既惹味又有創意。
