政壇：搞搞政：串燒三局長爆鑊停不了
究竟呢個政府發生乜嘢事？先係環境局局長「星星」黃錦星因為「一堆一爐」、繼而「四電一腦」徵費，令市民任由宰割，畀市民鬧爆之後，黑氣似乎已傳到接連「爆鑊」嘅運輸及房屋局局長張炳良同商務及經濟發展局局長蘇錦樑身上，張炳良更加係愈爆愈甘，佢哋可謂係串燒三局長。
設計圖片
張炳良喺上月自我引爆高鐵延誤風波，港鐵延誤理由「賴天又賴地」，之後高鐵內部文件滿天飛，力證港鐵早知高鐵會延誤同超支，有議員三令五申要求港鐵高層全盤交代事件，否則不排除會使用《立法會（權力及特權）條例》調查事件。同樣困擾佢嘅仲有南丫海難事故內部調查報告，政府堅持以可能影響刑事調查為由，拒絕披露整份報告內容予海難死難者家屬，有家屬直言由信任佢變為感到失望，睇嚟佢認真要快啲諗計「拆彈」至得。
同張炳良難兄難弟嘅蘇錦樑亦好濕滯，舊年十月先爆出免費電視發牌風波，及至今年初佢主責嘅旅遊事務又出問題，有反對內地個人遊嘅「驅蝗」行動、啟德郵輪碼頭被揭交通安排不善等「十宗罪」，佢最新回應內地旅客隨處便溺嘅「包容論」，更激起網民強烈反彈不滿，最後惟有補鑊撰文指包容唔等於縱容。究竟佢哋三個幾時先可搣甩呢股倒楣黑氣呢？就要睇佢哋嘅造化喇！
