政壇：張華峰牛一 證券界獻驚喜
立法會金融服務界議員張華峰牛一，本港九大證券團體非常有心，將喺聽日為「肥佬張」搞一個別開生面嘅生日會，仲特登為生日會改咗個名叫做「輕談喜聚華峰夜」。睇嚟，九個會一共百幾人，想同張華峰相聚談心，齊賀佢牛一。
李細燕話證券學會將會以「打油詩」賀張華峰牛一。（資料圖片）
九大證券團體為張華峰搞個別開生面嘅生日會。（資料圖片）
自從張華峰做咗議員之後，成日為中小經紀發聲，要求監管機構同政府關注中小經紀行經營愈嚟愈困難，所以佢同本地經紀關係好密切。聽聞，一班行家知道佢生日，即時起哄話要同佢搞生日會。生日會飲飲食食係指定動作，但生日會搞手更加不忘為佢送上驚喜。
搞手之一嘅證券學會會長李細燕話，學會將會以「打油詩」慶祝張華峰生日。佢哋都真係有心思，整咗個相架送畀張華峰，除咗集齊多年嚟張華峰嘅珍貴相片外，仲以「恭賀張華峰立法會議員生日快樂」為題作咗首詩畀張華峰。張華峰上個禮拜趁住立法會休會，飛咗去歐洲一轉充電，除咗「濕平」、食嘢外，佢亦不忘股壇大事「滬港通」，要求喺立法會財經事務委員會討論 「滬港通」，並且想邀請財經及庫務局局長陳家強上去講解一下。咁又係，中小經紀今鋪有冇得食「大茶飯」，還看「滬港通」！
