政壇：督察會義賣 助女同袍遺腹子
警隊女督察Kennis黃麗瑩今年二月不幸因難產離世，遺下三個月大兒子卓言，但醫生指卓言因腦部曾經缺氧，留下唔少後遺症，需要長期接受治療。警務督察協會最近就為卓言舉行籌款，喺警隊內部義賣一隻遇熱會變色嘅鴨仔，上面仲掛咗塊寫上「生命因你改變」嘅口水肩。
女督察黃麗瑩今年二月因難產離世，遺下囝囝卓言。（資料圖片）
警務督察協會為小卓言義賣遇熱會變色嘅鴨仔籌款，反應熱烈。（受訪者提供）
協會主席曾昭科話義賣變色鴨仔，係寓意即使遇上不幸，只要大家給予卓言一家支持同溫暖，就會由代表紫色嘅陰霾，變成代表白色嘅晴天。變色鴨仔推出僅幾日，反應好熱烈，七百隻已全部售罄，共籌得七萬元，現打算加推。
年僅三十三歲嘅Kennis，今年二月二號喺伊利沙伯醫院待產期間，竟出現萬中無一嘅羊水栓塞症，幾經搶救後仍返魂乏術，要剖腹救嬰，Kennis最終不幸離世。
