政壇：戴耀廷噏錯政敵個名
話說佔領中環行動下禮拜二就會舉行第三次商討日，尋日率先公布十五個符合國際標準嘅政改方案，大部分都係由泛民主派人士提出。佔中發起人Benny戴耀廷話，大部分建制方案不符指導原則，但都有「幫港之聲」成員何濼生嘅方案入圍。咦，乜唔係「幫港出聲」咩？似乎Benny將「幫港出聲」同「愛港之聲」混淆咗，睇嚟打正旗號反佔中嘅「幫港出聲」要諗吓點樣提高本身嘅知名度喇！
睇番十五個方案，包括大熱嘅學界方案、真普聯方案、十八學者方案等。Benny話已簽署意向書嘅人，可以喺商討日一人一票選出最高票嘅三個方案，到六月畀全港市民投票。對於大律師公會話公民提名違反《基本法》，佢話國際專家同公會意見超過九成五脗合，但專家冇排除公民提名，公會亦非一錘定音，佢哋會尊重公會睇法，但就唔完全同意公會嘅睇法喎。
