政壇：郭偉強谷人氣 獅子開大口
工聯會嘅立法會勞工界議員郭偉強作為立會新丁，一直冇乜人識，如果下屆轉直選可以話危危乎。尋日佢就無啦啦學埋啲激進泛民主派議員咁提出私人條例草案，將現時法定最低工資「兩年一檢」改為「一年一檢」，仲建議最低工資水平應該定為每小時三十九點七元，開價仲高過泛民黨派，真係獅子開大口。不過，私人條例草案通過嘅機會可以話微乎其微，最終都係煲冇米粥居多，睇怕佢都係志在谷吓知名度嘅啫。
設計圖片及對白
其實，工聯會內部有個不成文規定，勞工界議員只可以做一屆，所以郭偉強想連任就真係要諗諗計、發發功。佢尋日就趁最低工資委員會進行公眾諮詢期間，抓實最低工資呢個打工仔最關心嘅議題，聯同工聯會嘅勞工界前議員葉偉明齊齊舉行記者會爭取曝光。
冇米粥料難過關
郭偉強話，佢哋認為最低工資定為三十九點七元先至追得番通脹，又話當局進行檢討時往往只係參考前一年嘅數據，搞到最後出嚟嘅最低工資次次都滯後，同市場簡直嚴重脫節，所以要提出草案修訂。佢仲話自實施最低工資以嚟，僱員薪酬佔總經營開支百分比有跌冇升，顯示最低工資實施並冇加重僱主負擔，僱主冇理由交租畀地產商就唔嗌痛，畀錢員工就嗌痛咁話。
不過，過往議員提出私人條例草案都係冇米粥，郭偉強呢一煲都可能唔例外。我哋問佢有冇信心其他黨派會支持佢嘅草案啦，點知佢就話喺民生事件上，全香港應該得一個黨喎。唔知佢咁講係太天真定太樂觀呢？抑或係志在參與，一心只諗住谷吓人氣呢？
