百年建築養蚊 保育淪為空談
潮流興保育，港府亦唔執輸，開口埋口唔係保育就係活化，講到天花亂墜，可惜吹水唔抹嘴，港產官僚「忽然保育」，又點會有好結果吖。嗱，有辦你睇o架，有逾百年歷史嘅二級歷史建築大埔舊警察宿舍，被政府丟空荒廢多年，鋪塵養草，自生自滅，遲早連殼都冇得剩嘅咋。
所謂二級歷史建築，即係經古蹟辦評定為「具有特別價值須選擇性保留」嘅歷史建築物。建於一九○九年嘅大埔舊警察宿舍就係其中之一，佢嘅特別之處，係採用現在難得一見嘅工藝美術風格建成，金字瓦頂，外牆鋪以紅磚，堪稱「萬綠叢中一點紅」。呢個警察宿舍仲有個傳奇故事，話說一九一五年帶隊到上水龍躍頭成功獵虎嘅時任新界指揮官寶靈翰正係居於此處，因此被指為風水極佳，地靈人傑。
好嘞，大埔舊警察宿舍被評定為二級歷史建築，先後歸警隊、入境處及廉政公署所有，但自廉署人員於一○年底遷出後就成為「吉屋」，一直塵封至今。經過三年幾風吹雨打、日曬雨淋，建築物已經面目全非，唔止屋簷鋪滿枯葉，纏滿蔓藤，周圍更加係蚊蟲為患，磚牆亦已褪色，簡直係暴殄天物。
歲月神偷，可以令樣樣嘢都老化腐蝕消失，何況係極需保護嘅歷史建築？正如學者話齋，港英時代上址係新界最早期嘅政府建築物之一，家陣已經買少見少，極具價值，應盡快活化。立法會議員更鬧爆政府產業署漠視古蹟，未有與各部門保持溝通及妥善監管各政府物業，白白浪費土地資源。冇錯嘞，歷史建築年月久遠，歷盡滄桑，就好似光陰一樣，冇咗就係冇咗，多多錢都買唔番。與其丟空荒廢，點解唔將之活化，開放畀市民參觀？
講開又講，港府糟蹋歷史文物已經唔係新聞。呢，審計署去年先至炮轟當局保育不力，任由多幢古蹟及歷史建築物淪為日久失修、無人理會嘅孤兒仔，包括薄扶林舊牛奶公司高級職員宿舍、調景嶺茅湖山觀測台等。仲有呀，大家一定記得景賢里被人拆到甩皮甩骨，九龍塘李小龍故居淪為時鐘酒店，沙頭角葉定仕故居變成蝙蝠洞，何東花園被拆卸發展……繼續數落去嘅話，怕且數到天光都數唔晒。港府講多過做，究竟係咪有心保育，唔使問都知喇。
始終都係嗰句，港產官僚眼高手低，所謂保育歷史建築不過係大隻講嘅啫，既冇誠意，更冇行動，正一有破壞冇建設。你話嘞，百幾年嘅歷史建築都咁糟蹋，官僚仲話保育喎，呃鬼食豆腐咩，叮！
