電腦化不斷普及，好多人都會覺得提筆寫字嘅機會少咗，但一筆一畫寫就嘅文件往往更珍貴。音樂人趙增熹都係愛筆之人，佢仲透露，十幾年前太太送過一支墨水筆畀佢，珍藏多年，仲打算第日將墨水筆留番畀仔女。嘩，咁咪即係傳家之寶？

趙增熹昨獲送贈名筆，佢因此憶起太太當年送贈墨水筆畀佢嘅往事。

講起太太十幾年前送贈嘅筆，趙增熹顯得好甜蜜，佢話：「佢仲喺盒上畫咗好多個心！」支筆盛載咗夫妻間嘅甜蜜回憶，所以一直好好收藏，仲打算第日留畀仔女，但一支筆會唔會分唔勻呢？佢冇有怕：「好彩我有個朋友都送咗一支同一牌子嘅筆畀我，咁就一人有一支！」

第一手消息請下載on.cc東網iPhone/iPad/Android/Windows Phone Apps