城中鏡：「賣身」東華義演蓋鳴暉為報恩

粵劇係籌款活動嘅常青節目。東華三院副主席王賢誌（Vinci）上任後擔大旗搞籌款騷，打破慣例安排粵劇義演由一場變五場，背後多得愛唱粵劇嘅王媽媽Lily「發功」，叫齊班名伶撐場。「鳴芝聲劇團」已經撐足東華三院二十年，今次將派出台柱蓋鳴暉演出《梁祝》及《新再世紅梅記》。

蓋鳴暉（左二）與「鳴芝聲劇團」台柱吳美英（中）再度為東華三院義演，施榮恆（右二）、前主席李三元（右一）及王忠桐（左一）齊表謝意。

王賢誌（左）坐正東華三院副主席位後首次搞「粵劇月」，媽咪Lily叫齊班名伶來打氣。

馬清揚（右）愛聽交響樂，家姐馬清秀就係粵劇迷，一屋都係音樂發燒友。左為總理區宇凡。

東華三院今屆董事局成員好年輕，但講到粵劇，絕不陌生。Vinci、總理馮少雲及馬清揚都係粵劇戲迷，三位自細就跟家人睇粵劇，經典劇目早已琅琅上口。Vinci謙稱未夠班踏台板，事關佢媽咪唱平喉多年，喺阿媽面前，佢又點敢班門弄斧吖。東華三院主席施榮恆（Ivan）都係知音人，最愛《帝女花》，百聽不厭。

壓傷獲貼身照料

既然咁多東華粉絲，Ivan索性將六、七月定為「東華粵劇月」，義演由六月中起演夠五場，等戲迷過足癮，善款將全數撥捐「東華三院檔案及歷史文化基金」。

今年係「鳴芝聲劇團」第二十年為東華三院義演，咁長情，Ivan送上一個寫上「20」嘅生日蛋糕。原來蓋鳴暉「賣身」畀東華三院亦有段古，佢自爆○九年曾喺戲棚由高台墮下，被布景板壓傷尾龍骨，嚇到花容失色，幸得東華三院醫生貼身照料，所以幾忙都會報恩，為東華三院義演喎。

「粵劇月」只係「頭盤」，排住隊嘅節目仲有維也納合唱團及敲擊樂表演。Ivan話，任內會將文化活動加碼，等生活緊張嘅都市人輕鬆吓。