離島區議會坪洲及喜靈洲選區議員安慶英本月中因病辭世，按照現行法例，政府會於六個月內因議席懸空，舉行補選。我哋日前就接到有市民報稱，指早前因坪洲鄉事委員會修章而被踢出鄉委會嘅鄉議局副主席林偉強意圖翻生，或參加今次坪洲補選，循呢個途徑返鄉委會喎。尋日向林本人求證，佢就誓神劈願話，絕對無意參加今次補選，咁即係遠離坪洲嘅政治同鄉事舞台喎。

林偉強話，平日鄉議局及其餘民生工作已經要用好多時間處理，加埋佢有啲商務要做，所以唔會參選喎。其實林偉強本身係坪洲人，又曾經擔任坪洲鄉委會主席，無端端被踢出局，難怪畀人揣測佢會重回舊地。

不過，佢唔參加補選都有現實考慮嘅，如果堂堂鄉議局副主席參加補選都輸，咁樣好難面對一眾鄉親父老嘛。所以佢唔選，都係一個穩陣嘅抉擇，只係究竟佢因驚輸議席輸埋面子，抑或真係忙，就得佢先至知道喇！

第一手消息請下載on.cc東網iPhone/iPad/Android/Windows Phone Apps