政壇：歐智華收入冠絕歐銀CEO
銀行家嘅薪酬動輒天價，金融海嘯之後，啲banker人工就畀人望到實，不時有人喊打喊殺。財經網CNBC委託咗Equilar做咗一個歐洲大行總裁薪酬調查，結果發現，滙控CEO歐智華「贏到開巷」，去年全年人工加花紅高達一千二百七十萬美元（約九千九百零六萬港元），係歐洲各大銀行CEO之冠，但論加幅，就輸畀法農及瑞信嘅行政總裁。
歐智華
根據個調查，今年歐洲各大銀行總裁嘅薪酬都有加幅，好多位升幅甚至有百分之十以上添。升幅最多嘅係法國農業信貸銀行CEO，佢全年實收近三百萬美元，雖然同歐智華比依然差一大截，喺個榜入面只係排第十二，但同佢上年人工比就有百分之四十三升幅。排第二嘅係瑞信CEO，全年人工加花紅超過一千萬美元，升幅達百分之二十八，真係令唔少打工仔眼紅。而歐智華舊年嘅成績表就顯示，佢嘅薪酬增幅只有百分之五。
不過，歐盟由今年開始將會同歐洲銀行大班嘅花紅設上限，高層最多只可以獲取相當於一年嘅人工，所以都係風光埋最後今年，銀行又要諗計挽留啲銀行大班。
