政壇：立會暗藏高設防資料庫
訂立《檔案法》對地方政府保留珍貴檔案至為重要，但港府檔案管理混亂，立法程序等了又等都未見進展，令包括「貪曾」前特首曾蔭權爵士部分貪腐證據，都懷疑無聲無息被銷毀。相比之下，立法會檔案就公開、透明得多，不但唔怕公眾上門查閱，最近仲調動資源將立法會百年歷史上載網頁。更犀利嘅係，原來立法會大樓內有間可防火四小時嘅檔案庫，確保一切重要資料受到保護。
唔講唔知，立法會圖書館潛藏咗個檔案庫，據悉，檔案庫保存珍貴資料嘅規格跟足國際標準，單係檔案庫大門就足以抵抗大火四小時，室內氣溫長期維持攝氏十八度，自設空氣過濾系統，室內採用冇紫外光嘅LED燈，防止紙質隨時間變黃變脆。
立法會資訊科技部尋日向傳媒簡介改版後嘅立法會網站，公眾不但可以更方便重溫會議，搜索資料亦快捷好多。佢哋仲逐步公開立法會電子檔案，好似議員資料庫可以追溯到一八四三年第一屆立法局成員名單，原來當年四人立法局包括香港第一任總督砵甸乍爵士。除咗議員資料，就連一八五八年後立法局會議逐字記錄亦全部上載網站，不過，由於檔案年代久遠，加上舊時英官寫英文比較有個性，部分字眼意思都係靠估，但職員一定會註明邊個字靠估嘅。
