政壇：精簡利申制議員拗得激
立法會議員個人利益申報係體現立法會公正性嘅重要制度，但有議員竟然為咗慳少少時間，就想將行之有效嘅制度摒棄。話說立法會審議《二○一二年印花稅（修訂）條例草案》時，有相關法案委員會成員就覺得，議員每次開會都要就金錢利益進行利益申報，做法影響會議進程，所以建議作出修訂，議員個人利益監察委員會（CMI）尋日就討論有關問題，但最後都係煲冇米粥。
CMI開會討論議員應否參考英國下議院做法，即議員喺審議法案時只需喺法案委員會首次開會時申報金錢利益，其後嘅會議就毋須申報；如果處理修正案時，遇上修正案同議員個人利益有關，議員先需要再作申報。不過，委員范國威（Gary）就鬧爆話：「唔應該為節省五秒、十秒而去犧牲申報制度」。
Gary話，議員受到外界監察，會議情況亦經常被轉載，好易被人斷章取義，故此應維持現有制度，確保立法會公正形象。航運交通界議員易志明就反駁，話會議效率好重要，認為新建議並冇削弱公眾知情權，所以覺得申報一次就夠。其實班議員發言時精簡啲，會否比省略申報利益更加可以提升會議效率呢？
