政壇：富貴黨o靚仔畀阿婆鬧爆
全民退休保障議題向來極具爭議，立法會福利事務委員會退休保障事宜小組委員會尋日開會時就火花四濺，反對全民退保嘅自由黨李梓敬發言後，即刻被支持全民退保嘅婆婆用粗口連珠炮發狂轟，點知李梓敬頭也不回當聽唔到，繼續高舉手機玩「轉珠」遊戲（見圖），激到婆婆紮紮跳。
李梓敬發言時話，每個人都有責任供養自己父母，唔應該將責任外判畀納稅人，所以唔支持全民退保。有位婆婆好明顯唔滿意佢咁講，發言時用盡分半鐘狂鬧佢：「你唔好揞住良心講嘢啦，你會唔會老先，你將來係咪一定唔會衰先？一路都咁好、咁順利？第日你或者衰咗呢，要喺坑渠揦飯食呢？我總唔信你咁富貴！」婆婆太過激動，言詞間夾雜滾瓜爛熟嘅廣東話粗口，而且語出驚人，作為主席嘅張國柱想阻止都嚟唔切。
不過，李梓敬講完自己嘅論點後，就埋頭篤手機玩「轉珠」遊戲，仲好似驚人影唔到咁舉到部手機高一高。事後李梓敬辯稱，佢知道有人影緊佢，但佢專登唔收手，因為自己唔係議員，冇收過任何公帑，亦只係其中一名發言嘅市民，無責任聽其他團體表達意見喎。
