政壇：鬍鬚曾再玩狼來了靠嚇
立法會預算案「拉布」戰今日打響，由於議員有效修訂案共有一千一百九十二項，初步估計淨係表決都最少三十個鐘。政府好驚「拉布」拉出禍，財政司司長曾俊華（鬍鬚曾）無計可施下，早前又去信立法會主席，要求佢盡量喺五月中前通過《撥款條例草案》，否則公共服務會大受影響，鬍鬚曾仲再出動「狼來了」絕招，一味靠嚇，話隨時冇錢發放畀綜援戶，甚至冇人收垃圾……講到好似香港停頓咁。
設計圖片
主席不為所動
鬍鬚曾喺公共財政上已經演過好多次「狼來了」鬧劇，結果好似應咗個故事咁，被嚇嗰個曾鈺成一於懶理，只係搵秘書代筆回信就算，鬍鬚曾會唔會大感冇癮呢？佢早前致函立法會喊驚，話驚立法會未能及時通過《撥款條例草案》，有必要重申草案重要性，跟住佢列舉多項公共開支「靠嚇」，話如果限時前過唔到，唔止醫療、教育受影響，連維持治安、修路同掃街都未必有人手。
靠嚇之外，鬍鬚曾仲幫埋立法會定下死線，話早前通過嘅臨時撥款只夠政府用到五月底，假如計埋立法程序同授權安排，立法會最好喺五月中前就要通過草案，否則好多政策都會受阻。政圈一早有傳聞，曾主席不滿政府屢次將個波拋畀立法會，一味靠佢「剪布」而唔肯出手同議員談判。今次鬍鬚曾又發通牒咁款，曾主席都費事睬，索性叫秘書代筆回信，擺明冷處理。
不過，今次「拉布」戰唔止玩政府，隨時連泛民都玩埋，因為支聯會主席李卓人暫定喺五月十四號動議「平反六四」議案，若屆時仍然「拉布」，咁李卓人嘅動議亦要押後處理，唔能夠喺六四廿五周年前夕提出辯論嘞。
