城中鏡：徐子淇冧金秀賢老公呷醋
「千億新抱」徐子淇尋日喺山頂出席慈善步行活動並負責鳴槍主持起步禮，但佢話唔會參與步行，因為晚上就同老公李家誠飛往歐洲旅行，慶祝老公前日生日：「原本尋日上機，不過想出席埋今日嘅慈善步行活動先。所以一陣要趕返屋企執行李，爹哋、媽咪代我參與。小朋友知道我哋就走，都叫我哋帶埋佢哋去，我叫老公帶埋佢哋，不過佢好忍心話唔好。」佢坦言生完囝囝後將老公忽略咗，希望今次二人世界作補償。咁送乜嘢生日禮物畀老公？佢話送Google Glasses，喺外國見到人哋戴，帶埋去旅行玩吓先。
徐子淇尋日主持山頂慈善步行活動起步禮。
想扮打掃混入酒店
繼而佢自爆近期愛上韓劇《來自星星的你》男角金秀賢，連老公都呷金秀賢醋！佢話早前金秀賢來港，佢好想去見面會，但認為就算排隊都未必見到，佢話：「我知佢住我哋間酒店，我同老公講想去睇佢，叫佢畀套house keeping衫我去打掃等佢，老公話我傻！」
老公有冇呷其他醋？佢話：「其實我唔係好追星，好多人話佢靚仔，有朋友話同我囝囝好似，髮型、眼矇矇咁，要用呢個藉口老公先冇咁妒忌！」佢解釋喜歡金秀賢唔係男女愛情，而係覺得對方似小朋友一樣可愛，但最後都冇見到偶像。問到會唔會覺得可惜？佢話：「少少，自己都好內疚，當日小朋友放緊復活節假期，我仲想去等！有朋友話去咗都見唔到，睇電視見佢都夠。」
