政壇：鬍鬚曾扮醒硬銷亞博館
位於機場附近嘅亞洲國際博覽館（亞博館）係本港第二個會議展覽場地，有七萬平方米可租用面積，比起灣仔嘅香港會議及展覽中心（會展）多出幾千平方米，但由於位置非常偏僻，加上知名度遠遠不及會展，所以參展商同買家數字就比唔上會展喇。唔知係咪見到亞博館做足咁多年都係一潭死水，財爺鬍鬚曾尋日就特別喺網誌用二千字硬銷亞博館近年發展多元化業務，擺明就係自我感覺良好。
鬍鬚曾話雖然唔少大型國際展覽都要用好幾年時間籌備，當營辦商同會展一旦建立默契、參展商同買家形成習慣，要佢哋改去其他地方參展並唔容易，但亞博館至今只係營運咗八年，就已三度獲旅遊界權威雜誌選為亞洲最佳會議展覽中心嘅頭三位，今年更加躍升至第二位，全年有五十二日全館爆滿，相比兩年前十隻手指都數得晒算係唔錯喇。咁嘅數字都叫做唔錯，鬍鬚曾嘅要求認真低。
跟住佢仲話亞博館近年積極發展多元化業務，例如不時租出約有八千平方米嘅大廳，用作舉行容納到五千幾人嘅大型中式宴會，廚房可同時清蒸一百八十條魚。為保證食物質素，亞博館嘅大廚特別鑽研蒸魚嘅方法，包括計算每圍同廚房嘅距離同喺場地設立中途站，等侍應可適時加入葱絲熟油等配料，確保每條魚都以最佳狀態上枱。
講食就講到天花龍鳳，如果亞博館真係咁好，相信唔使佢硬銷，參展商自然會蜂擁去幫襯，會展亦唔會因不敷應用而多年來爭取擴建第三期；試問政府每年嘅重要酒會，例如新春酒會、升旗禮酒會等，都硬要選擇灣仔會展舉行呢？點解唔帶頭到亞博館舉行？說穿了咪係地點問題囉！套用番佢嗰句：行開喇！
