政壇：金刀梁夫婦唔敢食田雞
唔少人為咗健康而戒食肉類，仲興起一股素食風氣，雖然香港大學校務委員會主席「金刀梁」梁智鴻同太太梁馮令儀都唔係素食者，但原來亦有一種最怕食嘅肉類，就係田雞喇！
梁智鴻（右）同太太馮令儀話田雞有好多寄生蟲未死，令佢哋一直唔敢食田雞。
金刀梁出身醫學世家，而有「放射科女王」之稱嘅梁太亦係醫科出身，仲係香港放射科醫學院嘅創會會長。佢哋喺讀書時代經常要解剖老鼠、曱甴、狗鯊同田雞等昆蟲同動物。講起呢啲回憶，梁太話知道田雞嘅寄生蟲真係好多，而且田雞死咗，啲寄生蟲都仲未死，真係好恐怖，所以兩公婆一直都唔敢食田雞。
梁太又話飲食習慣係靠自細培養出嚟，好似佢就因為媽媽同家人都唔食羊，所以佢長大後亦習慣咗唔食羊肉。如果家人長期煮開某一類餸，好似蒸魚或蒸肉餅咁，食開一排之後突然冇得食，就會特別容易諗起想食。
