政壇：海怡商場風雲 三黨鬥插旗
各政黨喺選舉之前落區「插旗」大做民生議題已經係指定動作，但選舉過後，落敗嘅依然頻頻做民生議題就比較少見，好似最近有傳鴨脷洲海怡西商場會變成主打旅客嘅大型Outlet，令到海怡居民好擔心。新鮮出爐嘅新民黨當區區議員陳家珮當然落力，即刻約見大業主商討解決辦法，但估唔到競選落敗嘅人民力量袁彌明同白鴿黨都派人協助居民，睇嚟海怡居民好重視個商場會否變為個人遊Outlet，否則呢個議題都唔會變成政黨兵家必爭嘅戰場。
設計圖片及對白
陳家珮上星期已經率先聯同部分商戶約見大業主，希望業主盡快公布商場翻新計劃，等居民唔使咁擔心。但贏咗嘅落力，選舉中輸咗嘅唔代表佢哋撒手不管。雖然袁彌明輸咗，但時不時都有去海怡見吓居民，最近佢就去咗海怡開設八小時街站，收集到幾百份市民意見，白鴿黨都有派人協助海怡街坊，但完全唔見曾經參選嘅老鴿「單雞」單仲偕，反而見到「乳鴿」、南區區議員柴文瀚召開記者會，質疑大業主改變商場用途可能違反「城市規劃條例」。
葉劉澄清黨員出入正常
今次三黨齊集海怡大鬥法，三個黨都用唔同方法協助海怡西居民，而且仲要選舉後出現呢個局面，海怡居民真係唔知是福是禍？
講起新民黨，最近有傳該黨爆發退黨潮，該黨主席葉劉淑儀前日回應話，有人走唔出奇。正當大家以為佢承認有人退黨時，佢尋日就澄清話，一個黨有黨員出出入入好正常，該黨的確有人走，有人因為移民要離開香港，亦有人要去外地工作，好似該黨執委嘅關詠軒同吳有家，兩人都無遞交退黨信，只係關詠軒同佢講過因健康理由而淡出新民黨，唔想太專注黨務。不過，到底有幾多人「淡出黨務」而唔係退黨，葉劉就話未有確實數目。
