三堆一爐惹火頭 垃圾圍城使人愁
立法會畀人叫做「垃圾會」,原因非常簡單,因為呢個所謂嘅民意機關相當垃圾,開會經常吵吵鬧鬧,亂象叢生,烏煙瘴氣。其實,區議會亦唔好得去邊嘅咋,特別係講到處理垃圾問題咯喎,嗰種混亂同激進程度,同立法會簡直有得揮o架。
嗱,屯門區議會尋日就開咗一場「垃圾會議」。環境局局長黃錦星去推銷俗稱「三堆一爐」嘅擴建三個堆填區及興建焚化爐計劃,多名區議員以示威標語迎客,批評當局缺乏誠意,杯葛離場,結果釀成流會,會議被迫以座談形式進行。區議會變座談會,即係齋噏啫,黃錦星食咗個大檸檬,梗係要補鑊喇,佢話喎,三堆一爐方案已經討論咗十年,社會有共識急需處理垃圾問題,政府並非硬銷方案,未來會盡力同地區溝通咁話。
可惜話口未完,屯門區議會主席劉皇發就批評當局硬銷方案,指當局多個改善環境措施遲遲未落實,加上地區未有共識,促請收回成命,唔好霸王硬上弓。雙方各執一詞,雞同鴨講,你話點樣溝通吖?
即係咁,垃圾問題刻不容緩,硬銷又好,軟銷又好,最驚垃圾官僚搞嚟搞去都搞唔掂啫。屯門區議會流會事件最少反映兩個現象:第一,地區反對聲音愈來愈大,弱勢政府要擺平阻力,談何容易;第二,三堆一爐極之惹火,處處受阻,將軍澳係咁,屯門係咁,立法會係咁,區議會又係咁,簡直係四面楚歌,當局想闖關,仲難過登天喇。
講到底,三堆一爐阻力重重,加強溝通固然有必要,不過更重要嘅係港府必須做好自己份工,例如,環保政策有冇改善吖?地區環境衞生嘅措施做好未吖?源頭減廢及回收工作做成點吖?三堆一爐嘅宣傳推廣夠唔夠吖?如果當局乜都唔做,兩手揈揈,空槍上陣,盞好似尋日咁一拍兩散,自取其辱嘅咋。
當然喇,環保人人有責,垃圾問題大家都要承擔,要避免垃圾圍城,港府及市民一樣有責任。試諗吓,三個堆填區未來幾年將會陸續爆滿,如果唔擴建堆填區,又唔興建焚化爐,垃圾點解決呢?萬一垃圾圍城噩夢成真,盞全香港都受害嘅咋。冇錯,冇人願意將厭惡性設施放喺自己嘅後院,問題係,除咗三個堆填區之外,仲有邊度可以放置垃圾呢?唔通真係要將禮賓府改為堆填區?
總而言之,面對垃圾圍城危機,究竟應該點樣選擇,港府固然有責任,市民同樣有責任,大家最緊要心平氣和討論,意氣用事係解決唔到問題嘅,係咪!