「包容」呢個字絕對係一個潮語,因為中港矛盾由二○○三年開放個人遊開始,到近幾年又基於特區政府無上限接待,無王管式發展個人遊,讓大批大批嘅內地旅客遊港,以至矛盾近年爆發。於是,有啲膠官,無諗過去解決呢啲問題,反而只叫香港人「包容」啲,放開胸襟去接納呢啲不文明嘅行為。

中國人唔係東亞病夫,但係就肯定會當街除褲。網上近年不斷瘋傳一啲中國人隨地便溺嘅圖片,本來已經見怪不怪。點知,近日喺旺角西洋菜街行人專區,就有人抵唔住頸,用手機拍低正在隨街便溺嘅中國小童,佢老母竟然發難,要粗暴搶去拍攝者嘅手機,而另外一位拍低呢位老母行為嘅人,本來諗住勸交,點知最後仲要被打。呢場街頭「中港矛盾全武鬥」片段就喺網上瘋傳,內地網民嘅民族感情當然受到損害。因為佢哋自認為係恩主,現在過來香港當街派金,香港人應該感恩呀!所以,內地有網民發起,喺五.一內地嘅黃金周假期,集體嚟香港隨街便溺,勢要令香港遍地「黃金」。最搞笑嘅係,蘇錦樑局長被問及有關事件應點處理嘅時候,竟然叫香港人「包容」啲,呢啲說話真係難聽過粗口!

奇怪嘅係,香港有亂拋垃圾定額罰款,養寵物嘅人如果畀人捉到讓狗隻隨地便溺都要罰錢,為何冇聽過人類在街頭便溺而被票控嘅呢?我真係睇唔透。更睇唔透嘅係,內地超級左報《環球時報》可以完全違反人類思維邏輯,話影人哋當街便溺係不文明嘅行為。呢樣我真係認輸,我真係完全唔明白文章作者到底如何諗得出呢個說法。或者我真係要「包容」一下呢位作者。不過,我最唔能夠「包容」嘅係蘇局長,人哋去到你屋企隨地大小二便,你叫我去「包容」?除非啲人客係失禁,否則係零容忍!

第一手消息請下載on.cc東網iPhone/iPad/Android/Windows Phone Apps