政改方案五花八門,淨係泛民陣營都打崩頭,「佔領中環」行動(佔中)計劃下月六號舉行第三次商討日,但學民思潮已經急不及待聯同專上學生聯會提出最激嘅學界政改方案,從依家嘅發展睇嚟,泛民老鬼如真普聯嘅鄭宇碩等搞嘅三軌方案、「民主阿婆」陳方安生甚至十八名學者提出嘅方案都冇運行,反而黃之鋒等新丁嘅建議有人吼,今次真係o靚仔玩殘老鬼,分分鐘一腳踢咗佢哋出局添。

設計圖片及對白

民陣二十六個團體前日就三軌方案同學界方案進行投票,最後通過推薦學界方案。而三個婦女團體尋日亦發表聲明,宣布撤回「婦女政改方案」,改為全力支持學界方案,據悉保衞香港自由聯盟稍後都會表態支持學界方案。

其實三軌方案同學界方案都有公民提名,但學界方案就激烈得多,任何人只要攞到全港選民百分之一提名,或得到立法會百分之八直選議員支持,即可入閘成為特首候選人。對於現時激進嘅民情,睇嚟只係得政黨支持嘅三軌方案整定淪為籮底橙,真普聯召集人鄭宇碩雖然係資深學者,但佢同一班政界老鬼睇嚟都輸硬畀班學生囉。而包括白鴿黨羅致光等十八名學者提出的公民推薦方案,早前已被鄭宇碩批門檻高,家吓睇怕都難逃摺埋嘅命運,至於連公民提名同政黨提名都冇提嘅民主阿婆方案,就更加唔入流喇。估唔到一班泛民老鬼玩民主咁多年,卻畀學生一Q清袋,真羞家!

第一手消息請下載on.cc東網iPhone/iPad/Android/Windows Phone Apps