富而行善已成世界大趨勢,內地富豪亦唔落伍,阿里巴巴集團主席馬雲尋日失驚無神宣布要成立公益信託,規模有機會成為亞洲第一。馬雲與阿里嘅另一位創始人蔡崇信會透過捐出阿里購股權方式,各自成立公益信託,涉及嘅股份規模佔阿里百分之二股份,以阿里預期平均估值一點二四八萬億港元計,涉及嘅金額隨時可能超過二百四十億港元。

馬雲

佢哋兩人仲搵埋一大堆名人肯定呢項善舉,好似阿里董事兼軟銀主席孫正義、雅虎首席發展官Jackie Reses、紐約市前市長彭博、身體力行呼籲中國富豪捐身家做慈善嘅股神巴菲特、微軟創辦人蓋茨。雖然係咁,如今只披露有關購股權喺舊年獲發,行使條款未有披露,喺阿里即將上市嘅敏感期,呢次捐購股權,自然又可成為招股書另一焦點。

其實市場正關注阿里上市嘅招股規模,消息話佢哋可能擴大IPO規模,新股規模可能超過二百億美元,甚至可能打破農行(01288)一○年A+H股上市,所創下嘅二百二十一億美元集資紀錄,成為歷來全球最大嘅IPO上市案添。

第一手消息請下載on.cc東網iPhone/iPad/Android/Windows Phone Apps