泛民主派團體呢頭話要喺七月一日提早預演佔領中環,打正旗號反佔中嘅「幫港出聲」尋日另出招,佢哋公布會花約十萬元設立一個名為「陽光射佔中」嘅網站平台,七一當日畀市民上載佔中嘅相片同影片,聲言等啲參與佔中人士「流芳百世」喎。呢個構思會唔會惹爭議,甚至倒米幫佔中宣傳呢?好快就知喇。

「陽光射佔中」搞手話,六月底會成立平台,如果七一有人話要搞佔中行動,佢哋會鼓勵市民喺佔中期間用手機或攝錄機影低參與者違法行為,例如坐喺馬路,到時會有編輯檢視相片或留言係咪涉及私隱條例或誹謗成分,又話已經諮詢法律意見,公眾地方影相唔算犯法,留言係事實就冇問題喎。

搞手話參與得佔中就應該好自豪,唔會介意被人影,但之後又話唔係好多港人鍾意上鏡。不過咁樣影人相放上網算唔算網絡欺凌或白色恐怖?搞手聲稱呢啲係「網絡張揚」,尤其阻嚇貪玩嘅未成年人士,「救得一個得一個」,所以參與佔中前諗清楚,佢哋亦「盡量唔會太欺凌」,但就阻止唔到其他人向相中人起底嘞。

第一手消息請下載on.cc東網iPhone/iPad/Android/Windows Phone Apps