標誌、徽號係一個機構嘅象徵,標誌如果相撞都幾尷尬。成立二十年嘅自由黨兩度更改黨徽,依家嘅標誌係藍色同綠色兩環上下相扣、形成「自」字圖案,呢個黨徽係二○一一年先至設計,不過,有人就話呢個標誌同華人永遠墳場管理委員會嘅標誌好相似。

華永墳場委員會建築物嘅標誌,驟眼睇同自由黨標誌的確好似。(互聯網圖片)

自由黨標誌(互聯網圖片)

曾經從事設計嘅立法會議員范國威日前就喺社交網站貼文,公布佢呢項發現,只見自由黨黨徽同華人永遠墳場管理委員會嘅標誌真係幾似,都係兩個分別藍色同綠色嘅圓形圖案上下相扣,只係差頂部一個圓點,呢款有華永墳場委員會標誌嘅建築物照片上載到社交網站,唔少網民都驚訝竟然會咁巧合。唔知今次事件,會唔會令自由黨再起重新設計一個新Logo嘅念頭呢?

第一手消息請下載on.cc東網iPhone/iPad/Android/Windows Phone Apps