下一屆立法會選舉雖然仲有兩年,但政圈已經動作多多,新民黨自從年初同沙田最大黨公民力量(公記)結盟後,中央委員會委員人數大增,尋日佢哋公布新增十位黨員為中央委員,從最新嘅布局,可以睇到主席葉劉淑儀喺政壇圖擴版圖嘅雄心,尤其係「假髮大王」亞洲美髮美容協會會長趙振國,以及身兼香港品質保證局副主席嘅香港應用科技研究院榮譽顧問何志誠,呢兩名黨員突然進身中委,意在來屆立法會功能界別選舉嘅味道好濃喎。

設計圖片及對白

現屆僅兩直選議席

今次中央委員包括六名公記成員、啱啱成為南區區議員嘅陳家珮、新加入新民黨嘅屯門區議員蘇炤成及趙、何等,我哋先講趙振國,佢○八年以獨立候選人身份參加立法會選舉,就曾挑戰當時競逐連任嘅批發及零售界議員方剛,可惜最後以八百幾票輸咗呢場選舉,之後在一一年特首選舉委員會選舉,再次敗予方剛,但方剛過多兩三年就年屆七十,又做過三屆議員,所以一直有傳自由黨為搵接班人而頭痕。咁啱趙振國一年多前加入新民黨,前日通過咗會員大會之後,正式成為中央委員,選擇呢條政黨路,係咪諗住泊個大碼頭,再接再厲呢?

至於何志誠又點呢?據聞佢為人頗低調,從品質保證局網站所見,佢係工程師,不過我哋又打聽到應科院嘅人士多數係科技界朋友,莫非佢係新民黨進軍資訊科技界嘅武器?又或者意在創新及科技局﹖葉劉淑儀咁支持政府設創新及科技局,何志誠會唔會係副局長或政治助理嘅人選呢?

新民黨現時只有兩個立法會直選議席,無任何功能界別議席,葉劉早前招攬咗幾名功能界別議員入黨,包括保險界陳健波同建築、測量及都市規劃界謝偉詮等,可惜佢哋到依家都只係該黨嘅顧問,但下屆選舉新民黨向功能界別發展嘅脈絡已經頗清晰。

第一手消息請下載on.cc東網iPhone/iPad/Android/Windows Phone Apps