事先張揚道歉騷 小心菲國耍花招
馬尼拉人質慘劇發生三年幾，無賴總統阿基諾三世嬉皮笑臉嘅衰樣，香港人記憶猶新。之不過咁，菲國政府就算點樣賴皮，點樣無恥，始終都要面對現實o架。嗱，由於擔心港府隨時可能加大制裁，菲國終於認衰嘞，尋日死死氣派出多名官員來港，話要係向死難者家屬同傷者道歉及賠償喎。
尋日抵港嘅包括馬尼拉市長埃斯特拉達及幾位馬尼拉市議員，據講菲律賓警察總長及內閣部長亦會來港，菲國傳媒事先張揚，話今次行程係由菲律賓政府及馬尼拉市政府共同促成，預計今日會與港府及人質家屬會晤，明日會出席港菲聯合儀式，就道歉簽署協議，並提供合共二千萬元嘅賠償金。
即係咁，為咗呢個遲來嘅道歉，香港人已經等咗三年幾，死者家屬及幸存者四處奔波，心力交瘁，大家都係希望事件盡快有個了結啫。問題係，菲方冇嘢叻，最叻耍無賴，今次會唔會又係故技重施耍花招呢？事實上，所謂道歉都係菲方傳媒單方面發放，死者家屬事前一無所知，仲有吖，本來話代表三世祖嘅內閣部長阿爾門德拉斯同埋菲國警察總長都有同行，結果阿爾門德拉斯甩底，話自己身在馬尼拉喎。雖然菲國傳媒又話，阿爾門德拉斯今日先至來港參加會議，但事實究竟係點，仲要睇過至知。
講開又講吖，就算三世祖總統真係派代表嚟道歉，都係迫於無奈嘅咋。菲國傳媒係咁講嘅，官員今次來港，係避免兩地關係持續惡化，令在港菲傭簽證不獲續期。即係話，港府嘅制裁措施發揮作用囉。
太一叮一早講過，對付無賴政府，講道理係對牛彈琴，人質事件一拖再拖，菲方一賴再賴，咪就係港府猶豫不決，示弱人前囉。拖到最後，咪又係要效法台灣採取制裁措施，菲律賓當局至肯跪低咋。
講到底，菲方呢次道歉未必係真心認錯，而係為着自己利益，而且唔係雙腳跪低，充其量只算係單腿下跪咋。唔係咩，三世祖始終冇表過態，好多消息都係由菲國傳媒發放，而港方傳媒喺機場追問菲方人員，都係話等緊上面通知，到底係真道歉定做騷，會唔會變卦，唔到最後一分鐘都冇人知o架。
所以話啫，今次港府一定要打醒十二分精神，千祈唔好又畀人玩弄呀，最緊要係達成死者家屬提出嘅四項要求，包括道歉、賠償、懲處犯錯官員及保障旅客安全，呢個係底線，絕對唔可以退讓，否則，就算點樣道歉，意義都唔大吖，叮！
